Өлеңдер сөздерi / текст песни

Белгiсiз орындаушы - Тойтарқар

Тойбасқарушы:

Құмар-ау тамашаға, iзгiлiкке ел,
Мұндай тойдан сiз бенен бiз де үмiткер.
Баянды болсын ыстық ақ махаббат,
Тойтарқарды айтыңдар, қыз-жiгiттер!

Қыз-келiншектер:

Сүйген жүрек сөнбесiн, жалындасын,
Сүйген жүрек өзгенi сағынбасын.
Жұбайлар, қосағыңмен қоса ағарып,
Өмiрде алдарыңнан жарылқасын!

Арман қу әсте қалмай жолдарыңнан,
Келмес өнер болмасын қолдарыңнан.
Үбiрлi-шүбiрлi боп үйге сыймай,
Шұбырсын ұрпақтарың соңдарыңнан.

Құрбының көтере бiл базынасын,
Көңiлде жастық шақтың жазы қалсын.
Тiлеймiз Алатаудың асқақтығын,
Тiлеймiз тiрлiк-базар қазынасын.

Жiгiттер:

Гүлге жер, нұрға оранған асқарымыз,
Шұғылалы, шайдан ашық аспанымыз.
Кен қазып, егiн еккен, ғарышқа ұшқан,
Бақытты елдiң бақытты жастарымыз.

Бiзде бар өнер, бiлiм, парасат та,
Аласа төбелерге қонар шақ па.
Ту етiп адалдықты, пәк сезiмдi,
Барамыз еңбек, әнмен болашаққа.

Бәрi:

Жапырағы қурамас баһар бақтың,
Мәпелер оны жастық шапағат күн.
Жанымыз жаз орнатып жер бетiнде,
Қалықтасын ақ құсы махаббаттың,
Қалықтасын ақ құсы махаббаттың!